გაცნობებთ, რომ 2026 წლის 25 თებერვლიდან ამოქმედდა საერთაშორისო კონტროლირებული ოპერაციების შესახებ ინფორმაციის წარდგენის წესი.

იმ შემთხვევაში თუ კომპანიის მიერ წინა კალენდარული წლის განმავლობაში განხორციელებული საერთაშორისო კონტროლირებული ოპერაციების ჯამური მოცულობა აღემატება 500 000 ლარს, კომპანიას წარმოეშვება ვალდებულება შემოსავლების სამსახურს წარუდგინოს ინფორმაცია საერთაშორისო კონტროლირებული ოპერაციების შესახებ. აღსანიშნავია, რომ 500 000 ლარიან ზღვარში გაითვალისწინება როგორც ფაქტობრივად განხორციელებული ანაზღაურებების ოდენობა, ასევე უსასყიდლო ოპერაციების საბაზრო ღირებულება და არსებული დებიტორული და კრედიტორული დავალიანებების ნაშთები.

ინფორმაციის წარდგენა სავალდებულოა ნებისმიერი ტიპის საერთაშორისო კონტროლირებულ ოპერაციებზე, მათ შორის საქონლის/მომსახურების მიწოდება/შესყიდვა, მატერიალური/არამატერიალური აქტივების მიწოდება/შესყიდვა, სესხების მიღება/გაცემა, საპროცენტო შემოსავალი/ხარჯი და ა.შ.

წარსადგენი ინფორმაცია მოიცავს: ურთიერთდამოკიდებული პირის დასახელებას, საიდენტიფიკაციო ნომერს და რეზიდენტობის ქვეყანას, ურთიერთდამოკიდებულების ფორმას, საერთაშორისო კონტროლირებული ოპერაციის სახეს და მოცულობას, არსებული კრედიტორული/დებიტორული დავალიანების ნაშთის მოცულობას, ხელშეკრულების გაფორმების თარიღს და ინფორმაციას კონტროლირებული ოპერაციების შეფასებასთან დაკავშირებული დოკუმენტაციის ფლობის შესახებ.

ინფორმაციის წარდგენა მოხდება ყოველწლიურად, მოგების გადასახადის მარტის თვის დეკლარაციაში, შესაბამისი დანართის შევსების გზით. ხოლო იმ პირებისთვის, რომლებიც წლიურ მოგების გადასახადს იხდიან, ინფორმაცია წარედგინება წლიური მოგების გადასახადის დეკლარაციაში.

ცვლილება უკვე ამოქმედდა და ვრცელდება 2025 წლის და შემდგომ საანგარიშო პერიოდებზე.

დამატებითი ინფორმაციისთვის მოგვმართეთ.